Friday, November 16, 2018 | / - 0770586666 | - nethgossip.lk@gmail.com

‘රූපය කියන දේ සදාකාලික නැහැ‘ - අන්තර්ජාලය කැළඹූ ඡායාරූපයේ ඇත්ත කතාව උදාරි හෙළි කරයි(PHOTOS)

3428Views

උදාරි පෙරේරා කියන්නේ ප්‍රවේගය චිත්‍රපටය හරහා මෙරට සිනමා ලෝලීන්ගේ ආකර්ශණය දිනාගත්ත චරිතයක්.හිස මුඩුකරගත් ඡායාරූප පෙළක් නිසා පසුගිය දිනවල අන්තර්ජාලයේ ඇය ගැන කතාබහක් ඇතිවුණා.උදාරි ඇත්තටම හිස මුඩු කළේ ඇයි.මේ ඒ ගැන ඇය කියපු කතාව.

ඔබ හිස මුඩුකරගත් ඡායාරූප පෙළක් මේ දවස්වල අන්තර්ජාලයේ සැරිසරනවා. ඇත්තටම ඔබේ ඔය ලස්සන කොණ්ඩය කපා දැමුවාද?
නැහැ, මම ඇත්තටම කොණ්ඩය කපා දැමුවේ නැහැ. පිළිකා රෝගීන් වෙනුවෙන් කරපු ව්‍යාපෘතියක් සඳහායි මම ඔය විදියට පෙනී සිටියේ. ඇත්තටම කොණ්ඩේ තිබුණත් නැතත්, බාහිර ස්වරූපය නිසා දුකින් ඉන්න අවශ්‍ය නැහැ කියලා තමයි අපිට කියන්න වුවමනා වුණේ. “ගියා-ගත්තා” විදියේ ෆොටෝ ෂූට් එකක් නෙමෙයි මේක. ගොඩක් මහන්සි වෙලා කරපු ෆොටෝ ෂූට් එකක්. 
 
මේ වගේ හොඳ වැඩකට ඔබේ පෙනුම වුණත් වෙනස් කරගන්න කොහොමද අදහසක් ආවේ? 
ඉස්සර ඉඳලාම මම පිළිකා රෝගීන් වෙනුවෙන් කරන ව්‍යාපෘති එක්ක එකතු වෙලා වැඩ කරනවා. මගේ මිතුරු මිතුරියන්ගේ සහෝදර සහෝදරියෝ,  ඔවුන්ගේ දෙමවුපියෝ පිළිකා රෝගයට ගොදුරු වෙලා තිබුණා. පිළිකාවක් කියන්නේ හෙම්බිරිස්සාවක් උණක් වගේ නෙමෙයි. මෙවැනි  තත්ත්වයකදී අපි කොහොමද ධනාත්මකව හිතෙන්නේ... සතුටින් ඉන්නේ කොහොමද කියන පණිවුඩය තමයි මා ඇතුළු කණ්ඩායමට සමාජයට දෙන්න ඕන වුණේ. ඒ සඳහා මම හරිම කැමැත්තෙන් ඡායාරූපවලට පෙනී සිටියා. 
 
කොණ්ඩේ ඇත්තටම තට්ටේ ගාපු වේෂ නිරූපණයක් ඔබට ලැබුණට පස්සේ කණ්ණාඩියෙන් එහෙම මුහුණ බැලුවද?
බැලුවා... බැලුවා... ඒ වෙලාවේ දුකක් නමෛයි හිතට ලොකු නිදහසක් දැනුණා. කොණ්ඩෙත් සමහර වෙලාවට අපිට කරදරයිනේ. තැනකට යන්න ගියාම කොහොමද කොණ්ඩය පීරන්නේ කියන එකනේ ගැහැනු ළමයින්ට තියෙන ලොකුම ප්‍රශ්නය. නිළියක් වුණොත් මේ ප්‍රශ්නය තවත් වැඩියි.  කොණ්ඩය නැතිව තට්ටේ විතරක් තියෙනවා කණ්ණාඩියෙන් දකින කොට මට නම් හිතට ආවේ ඔය වගේ හැඟීමක්. 
 
තට්ටේ එක්ක ඔබව දැක්කට පස්සේ කට්ටිය මොකද කිව්වේ?
හැමෝම ලස්සනයි කිව්වා. ඒ මදිවට වැළඳගෙන සුබ පැතුවා.
 
බොහෝ විට පිළිකා රෝගීන් කොණ්ඩේ යෑම නිසා ඉක්මනින් කම්පනයට පත්වෙනවා. ජනප්‍රිය රංගන ශිල්පිනියක් විදියට මේ වගේ ව්‍යාපෘතියක් හරහා ඔබ ඔවුන්ට ලබාදෙන පණිවුඩය කුමක්ද? 
රූපය කියන දේ සදාකාලික නැහැ. ඒක හැමෝටම ‍පොදු දෙයක්. රංගන ශිල්පිනියක් විදියට මටත් ඒ කාරණය ‍පොදුයි. පිළිකාව කියන්නේ අපිට එකපාරටම පාලනය කරන්න බැරි ලෙඩක් වුණත් දැන් ඒ සඳහා ප්‍රතිකාර තිබෙනවා. සමහරු ධනාත්මකව හිතලා තමන්ගේ  ශරීරය සහ මනස කොයිතරම් ලස්සනට තියාගන්නවාද කිව්වොත් පසුකාලීනව ප්‍රතිකාර එක්කම පිළිකාව ශරීරයෙන් ඉවත් වෙලා ගිහින් තියෙනවා. ඒ අයගේ ධනාත්මක චින්තනය නිසයි එහෙම වුණේ. පිළිකා රෝගීන්ට මුළු ලෝකය කඩාගෙන වැටුණා වගේ දැනෙන්න පුළුවන්. ඒත් මිනිස්සුන්ගේ හිත වගේම විශ්ව ශක්තියත් එකතු වුණාම ගොඩක් දේවල් කරන්න පුළුවන්. ඒ නිසා මම පිළිකා රෝගීන්ට ආදරෙන් කියනවා ලෙඩේ ගැනම හිතන්නේ නැතිව ධනාත්මකව හිතන්න. ඒ ධනාත්මක චින්තනයට පුළුවන් ඔබව සුවපත් කරන්න කියලා. අපේ හිත ශක්තිමත්ව තබා ගත්තොත් පිළිකාව වුණත් පරාද කරන්න පුළුවන් කියලා කියන්නයි මට වුවමනා වුණේ. ඒත් එක්කම එබඳු රෝගීන්ව දිරිගන්වන්නත් මට වුවමනා වුණා.
 

 

සංවාදය - ලක්බිම/ ඡායාරූප - සංදේශ් බණ්ඩාර