Monday, October 3, 2022
/ - General line - 0115112241 | - [email protected]

වෙදදුරු වෙසින් හිඳ නැවතුනු හදවතට පණදුන් හලාවත දෙවිවරු

1196Views

 

 
 

 

 

හදවත අකර්මණ්‍ය වූ ගැබිනි මවකට පැය දෙකක කාලයක් කෘත්‍රිම හෘද ස්පන්දනය ලබා දෙමින් කළ සිසේරියන් සැත්කමකින් පසු බිලි¼දා සහ මව බේරා ගැනීමට හලාවත මහ රෝහලේ කාර්ය මණ්ඩලය සමත්ව තිබේ. මේ මව ඉතා අසාධ්‍ය තත්ත්වයේ සිට ඇති අතර ඇගේ දරු ගැබට සති තිස්දෙකක කාලයක් ගතව තිබී ඇත. මේ මව හලාවත රෝහලට ඇතුළත් කර ඇත්තේ ගල්මුරුව පර්යන්ත රෝහලේ සිට පසුගිය 20 වැනිදා රාත්‍රි 11.25ට පමණය.

වහා ක්‍රියාත්මක වූ හලාවත මහ රෝහලේ කාර්ය මණ්ඩලය, හලාවත මහ රෝහලේ ප්‍රසව හා නාරිවේද විශේෂඥ වෛද්‍ය ගයාන්ද සිල්වා මහතා දැනුවත් කිරීමෙන් පසු විනාඩි තුනක් වැනි කෙටි කාලයකින් ශල්‍යාගාරයට ඇතුළත් කර ඇති නමුත් මවගේ හදවත අකර්මණ්‍ය වී තිබේ. ඉන් අනතුරුව වහා ක්‍රියාත්මක වූ කාර්ය මණ්ඩලය මවට කෘත්‍රිම හෘද ස්පන්දනය ලබා දෙමින් සිසේරියන් සැත්කම කර දරුවා ගැනීමට ක්‍රියාකර ඇත. මවගේ හදවත යථා තත්ත්වයට පත්වීමට පැය දෙකක පමණ කාලයක් ගතවී ඇති අතර ඒ වන තෙක් අඛණ්ඩව මවට කෘත්‍රිම ස්පන්ධනය ලබාදීමට රෝහල් කාර්ය මණ්ඩලය පියවර ගෙන තිබේ.

මේ වනවිට මව  කොළඹ ජාතික රෝහලේ හෘද රෝග ඒකකයට මාරු කර ඇති අතර බිලිඳිය හලාවත මහා රෝහලේ ළදරු ඒකකයේ ප්‍රතිකාර ලබයි. මේ පිළිබඳව අදහස් දැක් වූ හලාවත මහා රෝහලේ ප්‍රසව හා නාරිවේද විශේෂඥ වෛද්‍ය ගයාන්ද සිල්වා මහතා පැවැසුවේ තම වසර විසිපහක වෛද්‍ය ජීවිතයේ මෙවැනි අත්දැකීමක් නොමැති බවයි. වෛද්‍යවරයා ඇතුළු සියලු කාර්ය මණ්ඩලයේ කැපවීම මත මේ ජීවිත දෙක බේරා ගැනීමට හැකි වූ බවද විශේෂඥ වෛද්‍ය ගයාන්ද සිල්වා වැඩිදුරටත් පැවැසීය.

මෙහිදී කරුණු දැක්වූ හලාවත මහ රෝහලේ අධ්‍යක්ෂ වෛද්‍ය කපිල මල්ලවආරච්චි මහතා පැවැසුවේ, පුත්තලම දිස්ත්‍රික්කයේ ප්‍රධාන රෝහල ලෙස මේ වන විට හලාවත මහ රෝහල සෑම ක්ෂේත්‍රයකින්ම ඉදිරියට පැමිණ ඇති බවයි. මේ මව කොළඹට මාරු කර යැවීමට හේතු වූයේ දැඩි  අවධානයක් මේ මව සඳහා ලබාගැනීමට බවද පැවැසීය. බිලිඳියගේ සෞඛ්‍ය තත්ත්වය යහපත් මට්ටමක පවතින බව හලාවත මහ රෝහලේ අධ්‍යක්ෂ වෛද්‍ය කපිල මල්ලවආරච්චි වැඩිදුරටත් පැවැසීය.

උපුටා ගැනීමකි.
හලාවත – ප්‍රසාද් පූර්ණමාල් (මවුබිම පුවත්පතින් )